Аҕа саастаахтар декадаларын чэрчитинэн көрсүһүү
Аҕа саастаахтар декадаларын чэрчитинэн бүгүн клубка олус сэргэх көрсүһүү буолла. Салгыы хаартыскаларга кимнээх кэлбиттэрин көрүҥ.
Тэрээһин кэннэ нэһилиэкпит ытык кырдьаҕастартан биирдэстэрэ, «Биһик» уһуйаан ветерана, ону тэҥэ биһиги телеграм-каналбыт эрэллээх ааҕааччыта Анна Егоровна Пахомова ватсапка санаатын суруйбутун үөрэ аахтыбыт: «Үтүө киэһэ буоллун, үөлээннээхтэрим!
Аҕам саастаахтар күннэрин бэлиэтээн Антоновкатааҕы култуура киинигэр аһара үчүгэй тэрээһин буолла. Октябрьскай нэһилиэк дьаһалтата, кулууп эдэр эрчимнээх үлэһиттэрэ бэртээхэй бэлиэ күнү аҕам саастаах дьоннорун ытыктаан, убаастаан бэрт дьоро күнү бэлэхтээтилэр. Олус үчүгэй эҕэрдэ кэнсиэри туруоран эҕэрдэлээтилэр, бэрт көрдөөх бэһиэлэй киэһэ буолла. Ытык мааны дьоннорбут этэҥҥэ сылдьан көхтөөхтүк кэлэн көрсүспүппүтүгэр аһара диэн үөрдүбүт, долгуйдубут даҕаны, бэрт өр көрбөтөх дьоммутун көрөн астынныбыт. Бары тэрийээччилэргэ, кэлбит дьоҥҥо барыгытыгар махтал, өссө да итинник тэрээһиннэри инникитин күүтэбит. Бары доруобай этэҥҥэ сылдьыҥ, чөл туруктаныҥ, чэгиэн-чэбдик буолуҥ! Өссө төгүл БАҺЫЫБАЛАРЫҤ!».